መልክዐ ማርያም

መልክዐ ማርያም
ማርያምሰ ኃርየት መክፈልተ ሠናየ ዘኢየኅይድዋ ይእቲ ፀዓዳ ዘእምነገደ ይሁዳ ሠረገላተ አሚናዳብ ንብረታ። በኅዳር ጽዮን “ሙሴኒ ይቤላ” በል።
ሰላም ሰላም ለዝክረ ስምኪ ሐዋዝ፡ እምነ ከልበኔ ወቍስጥ ወእምነ ሰንበልት ምዑዝ፡ ማርያም ድንግል ለብሲተ ዐቢይ ትእዛዝ፡ ይሥቅየኒ ለለጽባሑ ወይነ ፍቅርኪ አዚዝ፡ ከመ ይሠቅዮ ዉኂዝ ለሠናይ አርዝ። ሰላም ለሥዕርተ ርእስኪ ዘተንእደ ፅፍሮሁ፡ ለአቡኪ በከናፍሪሁ፡ ማርያም ድንግል ለእግዚአብሔር ጽርሑ፡ ለገብርኪ እግዚእትየ ኢትኅድግኒ እላሁ፡ ከመ ኢይበሉኒ ፀር አይቴኑመ ምክሑ።
ሰላም ለርእስኪ በቅብዐ ቅዳሴ ርሑስ፡ አኮ አኮ በቅብዐ ደነስ፡ ማርያም ድንግል ንጽሕተ ሥጋ ወነፍስ፡ ያንጽሓኒ እምነ ርኩስ በፍሕመ ቍርባኑ ቅዱስ፡ አዝዚዮ ለሱራፊ ዘሰማይ ቀሲስ።
ሰላም ለገስኪ ዘጥቀ ይልሂ፡ እምሥነ ከዋክብት ወወርኅ ወእምሥነ ፀሐይ መብርሂ፡ ማርያም ድንግል ፍናዋትየ ሠርኂ፡ በመዓልት ወበሌሊት ኢይርከበኒ ጸናሒ፡ መሥገርተ አበሳ ዘይጠፍር ወግበ ዘይደሂ። ሰላም ለቀራንብትኪ ደመናተ ብካይ እለ ኮና፡ ከመ አመ አሕመመ ወልደኪ ቅንአተ ቀያፍ ወሐና፡ ማርያም ድንግል ለባሲተ ንጽሕ ወቅድስና፡ አስምዕኒ ነገረ ጽድቅ ዘያስተፌሥሕ ሕሊና፡ ከመ አስተፍሥሐኪ ጥቀ ዘመልአክ ዜና።
ሰላም ለአዕይንትኪ ዘተመሰላ አብያዘ፡ እለ ይፌጽማ ትእዛዘ፡ ማርያም ድንግል እንተ ኢተአምሪ ጋዕዘ፡ ናዝዝኒ በንባብኪ እመ ልብየ ተከዘ፡ በሐብለ ሰቆቃዉ ጽኑዕ ኢይኩን እኁዘ።
ሰላም ለአዕዛንኪ እለ ሰምዓ ቃሎ፡ እግዚአብሔር እግዚእ ሶበ ለገብርኤል ተመስሎ። ማርያም ድንግል ጽሕቅት ለተሣህሎ፡ ሶበ ለልብየ እሳተ ኅዘን አሕለሎ፡ ያፅምአኒ እላ ነገርየ ኩሎ።
ሰላም ለመላትሕኪ በእሳተ አንብዕ እለ ዉዕያ፡ ጊዜ ሰቀሉ በኩረኪ ዉሉደ ራኄል ወልያ፡ ማርያም ድንግል ለነብስየ ደብረ ምስካያ፡ አድኅነኒ እምአፍ ደም ዘአናብስተ ሐቅል አርአያ፡ ከመ ማኅፈር ጠቢብ ወምእመን ኬንያ።
ሰላም ለአዕናፍኪ መሳክወ ሠናይ መዓዛ፡ ይኄይስ ፈድፋደ እምፄና ስኂን ዘጠረጴዛ፡ ማርያም ድንግል ለሕይወትየ ምርጉዛ፡ ሰዋስዉ ዘምድረ ሎዛ እንተ ርእየኪ ወሬዛ፡ አመ ዕለተ ፍዳ ኩንኒ ቃዉመ ወቤዛ።
ሰላም ለከናፍርኪ ከመ ፍሕሶ ቀይሕ፡ ቅድሴ ወንጽሕ፡ ማርያም ድንግል ኆኃተ ጽባሕ፡ ባልሕኒ እምነ ወይሌ ወአንግፍኒ እምላህ፡ እስመ ለልብየ ኅዘኑ ብዙኅ፡፡ ሰላም ለአፍኪ ዘሰዐመ ርስነ፡ እንዘ አበ አዕሩግ ዉእቱ በጊዜ ኮነ ሕፃነ፡ ማርያም ድንግል ዘትፄንዊ ስኅነ፡ ኅፍረተ አበሳ ሶበ ገጽየ ተከድነ፡ ለናዝዞትየ እሙ ብጽሒ ፍጡነ።
ሰላም ለአስናንኪ ሐሊበ ዕጐልት ዘተዛወጋ፡ ወመራዕየ ቅሩፃተ እለ እምሕፃብ ዐርጋ፡ ማርያም ድንግል ለደብተራ ስምዕ ታቦተ ሕጋ፡ አፍቅርኒ እንበለ ንትጋ ለብእሴ ደም ወሥጋ፡ ዘየዐቢ እምዝ ኢየኅሥሥ ጸጋ።
ሰላም ለልሳንኪ ሙኃዘ ሐሊብ ወመዓር፡ ዘተነብዮ ወፍቅር፡ ማርያም ድንግል ወለተ ድኁኃን፡ አድባር፡ ኅብእኒ እምዐይነ ፀር ወአንጽሕኒ እምነዉር፡ እስመ ተስፋየ አንቲ በሰማየ ወምድር። ሰላም ለቃልኪ እምአስካለ ወይን ጥዑም፡ ወእምድምፀ ናብሊስ አዳም ዘያረስዖ ለሕማም፡ ማርያም ድንግል ዘብርሃነ ሕይወት ተቅዋም፡ እመ ተሀዉከ በላዕለየ ማዕበለ ዝንቱ ዓለም፡ ከመ ያርምም ገሥፂዮ መሓሪት እም።
ሰላም ለእስትንፋስኪ ዘመዓዛሁ ሕይወት፡ ከመ መዐዛ ዕፅ ኅሩይ ዘዉስተ ገነት፡ ማርያም ድንግል ቤተ ቅድሳት፡ጽንሕኒ ዉስተ ሠናይ ወሠዉርኒ እሞት፡ በአክናፍኪ ርግብየ ኅሪት።
ሰላም ለጉርዔኪ ሠናይ እምወይን፡ በከመ ይቤ ሰሎሞን፡ ማርያም ድንግል ለባሲተ ዐቢይ ብርሃን፡ ክድንኒ ገርዜነ ጸጋ ኢያዕፅበኒ ዕርቃን፡ ዘኢአነምዎ ጠቢባን በኪን።
ሰላም ለክሳድኪ ቃማ ንጽሕ ዘዐነቀ፡ ከመ አዋልድ አኮ ብሩረ ወወርቀ፡ ማርያም ድንግል ዘተመሰልኪ ማዕነቀ፡ ሕይወትየ በንዝህላል እመ ተሠልጠ ወኅልቀ፡ ወስክኒ ክራማተ እስከ እገብር ጽድቀ።
ሰላም ለመታክፍትኪ እለ ግኁሣት እማንቱ፡ ለጌጋይ እምነ አርዑቱ፡ ማርያም ድንግል ለሆሤዕ ሠርጐ ትርሲቱ፡ በልኒ እግዝእትየ ጸሕቀ ሕሊናየ ዝንቱ፡ ፍኖተ የማን ይምራሕከ ወተአኰት ቦቱ።
ሰላም ለዘባንኪ እምዘባነ ኪሩብ ዘዐብየ፡ ሐዚሎ እሳተ ወእምርስነ ነዱ ኢዉዕየ፡ ማርያም ድንግል ፈጻሚተ ኩሉ ጻሕቅየ፡ ሀብኒ እግዝእትየ ዘተመነይኩ ሠናየ፡ እንበለ አፅርዖ ፍጡነ በጺሐኪ ዝየ።
ሰላም ለእንግድዓኪ ለእሳተ መለኮት ምርፋቁ፡ ማርያም ድንግል ለነዳይ ንዋየ ወርቁ፡ እመ ነገደ ርኅቀ ወሖረ ዕራቁ፡ ኢያኅዝኖ ሲሳይ እስመ አንቲ ስንቁ።
ሰላም ለኅፅዊተ ለጥበበ ሰማይ ምዕራፋ፡ ዘኢትረከብ ሱታፋ፡ ማርያም ድንግል ጸጋዊተ ሰላም ወተስፋ፡ ኩንኒ እግዚእተየ ቅድመ ፀርየ ሐገፋ፡ ከመ ዖፍ አፍኅርቲሃ ትሤዉር በክንፋ።
ሰላም ለአእዳዉኪ እሳተ መለኮት እለ ገሠሣ፡ አውቃፈ ብሩረ ወወርቅ ለሥርጋዌሆን ኢኅሠሣ፡ ማርያም ድንግል ለመካን ህንባበ ከርሣ፡ አንጽሕኒ እግዝእትየ ለፍትወተ ዓለም እምርኩሳ፡ በዲበ ሥጋየ ኢትንበር ነጊሣ።
ሰላም ለመዛርዕኪ ዘተረሰያ ኃይለ፡ ከመ ይፁራ ነበልባለ፡ ማርያም ድንግል እንተ ኅጣእኪ መምሰለ፡ ኃጢአትየ ለገብርኪ ከመ ፈድፈደ ተለዐለ፡ ከመ ጥቅም ዘባቢል ረስዩ ንኁለ።
ሰላም እብል ለኩርናዕኪ እዌድሶ፡ ለእሳተ መለኮት በላዒ አምጣነ ኮነ ትርአሶ፡ ማርያም ድንግል ምዕዝት ዘእምአንክሶ፡ ህልዊ ደርገ ምስሌየ እንዘ አልብኪ ተግኅሦ፡ ለሕሊና ልብየ ወትረ እንግርኪ ማኅሠሣ።
ሰላም ለእመታትኪ እለ ጸንዓ ይፍትላ፡ ሜላተ ወወርቀ በናዝሬት ወበገሊላ፡ ማርያም ድንግል ለዮዲት ጥበበ ቃላ፡ ብጽሒ በሠረገላ ንትመሐል መሐላ፡ ከመ ታኅድርኒ በብሔር ዘተድላ።
ሰላም ለእራኃትኪ እለ ስፋሐት ለመጥዎ፡ ማርያም ድንግል እስእለኪ በተስፋዎ፡ ከመ እክሀል በበ ፆታሁ ስብሐታተኪ ዜንዎ፡ ለገብርኪ ዓብድ ምልእኒ ለብዎ።
ሰላም ለአፃብዕኪ እምእራኃ እዴኪ እለ ሠረፃ፡ እምኁልቈ ሠላድ ወስብዕ እንዘ ኢየሐፃ፡ ማርያም ድንግል ደብረ ኤልያስ ነቢየ ፋጻ፡ ዕቀብኒ በረድኤትኪ እምነ እርዌ ዘኆፃ፡ ህየንተ ሠናይ ለሰብእ ዘይሁብ ዐመፃ።
ሰላም ለአፅሁብ እዴኪ መልዕልተ አፃብዕ እለ ሠረቃ፡ በበሕቅ ዘልፈ እንዘ ይልኅቃ፡ ማርያም ድንግል ማኅቶትየ በውስተ ጣቃ፡ ኢትሰድኒ ለገበርኪ ለዓመትየ በንፍቃ፡ ዝንቱ ውእቱ ለልብየ ጻሕቃ።
ሰላም ለአጥባትኪ እለ አውኃዛ ፍጽመ፡ ድንግልናዌ ሐሊበ ዉስተ አፈ አምላክ ቅድመ፡ ማርያም ድንግል እንተ አምጻእኪ ሰላመ፡ ኅክታመ፡ ዘእንበሌኪ ኢየኅሥሥ እመ።
ሰላም ለገቦኪ ዘሐመልማለ ወርቅ ክዳኑ፡ በከመ ዳዊት ይዜኑ፡ ማርያም ድንግል ለያቆብ ሞገሰ ሥኑ፡ በልኒ እግዝእትየ አፈቅረከ አኮኑ፡ እንዘ ረዳኢትከ አነ ዘይክለከ መኑ።
ሰላም ለከርሥኪ ዘአፈድፈደ ተበፅዖ፡ እምታቦተ ሙሴ ነቢይ ለጽሌ ትእዛዝ ዘየኅብኦ፡ ኣምርያም ድንግል ጊዜ ጽዋዕኩኪ በአስተብቍዖ፡ ለፀርየ ብእሴ ዐመፃ ኃይለ ዚአኪ ይጽብዖ፡ እስከነ ያስቆቁ ጥቀ ድኅሪተ ገቢኦ።
ሰላም ለልብኪ እምነ በቀል ርኅቅ፡ እምጥነ ዐረብ ወሠርቅ፡ ማርያም ድንግል ገነት ኅሩያን ደቂቅ፡ ክድንኒ ልብሰ ከብካብ ለቅኑይኪ ዕሩቅ፡ ከመ ጽጌሁ ዘወርቅ።
ሰላም እብል ለኩልያትኪ ክልኤ፡ ዘቅብዐ ክህነት ቀርን ወዘወይነ ትፍሥሕት ግምዔ፡ ማርያም ድንግል ብልኒ ቅድመ ጉባኤ፡ ሕፃንየ በእንቲአየ ይከዉነከ ረዳኤ፡ እመራደ ፀርከ ሕቀ ኢትፍራህ ትንሣኤ።። ሰላም ለሕሊናኪ ሐልዮ ሠናያት ልማዱ፡ ወገበረ ምሕረት መፍቅዱ፡ ማርያምን ድንግል ለዳዊት ወለተ ወልዱ፡ ንዝሕኒ በአዛብኪ ዘይትረከብ ዘመዱ፡ ወበማየ ሕይወት ሕፀብኒ እምበረደ እፃዕዱ።
ሰላም ለአማዑትኪ ነበልባለ ኅዘን ዘአውዐየ፡ እመ ወዐለ ወልዲኪ ስቄለ በቀራንዮ፡ ማርያም ድንግል ፀምረ ጠለ ዘተነበዩ፡ ጌጋይየ አስተርአዮ እንተ አልብኪ ተፈልዮ፡ በሥርዐተ ካህን ላዕሌየ አንኂ ጸልዮ።
ሰላም ለንዋየ ዉሥጥኪ አምሳለ ንዋያ ለደብተራ፡ ስብሐተ ልዑል ዘይሤዉራ፡ ማርያም ድንግል ትምክሕተ ደቂቃ ለሣራ፡ ባልሕኒ ወለተ ቅስራ ለዓለመ ጽልመት እምፃዕራ፡ እስመ መቅዓን ወጠዋይ ምሕዋራ።
ሰላም ለንዋየ ውሥጥኪ አምሳለ ብዋያ ለመቅደስ፡ ንዋይኪሰ ኢየሱስ ክርስቶስ፡ ማርያም ድንግል ዘገዳመ ሲና ጳጦስ፡ ከመ ያነቅሖ ለልበ ዘፋኒ ናብሊስ፡ ፍቅርኪ ያንቅሐኒ በሥጋ ውነፍስ።
ሰላም ለኅንብርቲኪ ከመ ማዕከክ ርእየቱ፡ ዘኢየዓርቅ እምቱስሕቱ፡ ማርያም ድንግል ለካህን ዕፀ ኅርየቱ፡ ከመ ኢይኩን ፅሩዐ ንባበ አፍየ ዝንቱ፡ በጽዋዐ ኪሩብ ደዩዮ ወሡጢዮ ሎቱ።
ሰላም ለማኅፀንኪ ለእግዚአብሔር ማኅፈዱ፡ ዘሐነፀኪ የማነ እዱ፡ ማርያም ድንግል ማዕዝት ዘእምናርዱ፡ ኅቤኪ ያንቀዐዱ ለረኪበ ኩሉ ምፍቅዱ፡ ምስለ ካልኡ ዐይንየ አሐዱ።
ሰላም ለማዕፀንኪ ለእግዚአብሔር ዘውጉ፡ ብዑድ ሥርዐቱ ወፍሉጥ ሕጉ፡ ማርያም ድንግል ለአስካለ ሕይወት ሐረጉ፡ በልኒ እግዝእትየ ኃጢአተከ ኅደጉ፡ ወመኃልየከ ስማየ አዕረጉ።
ሰላም እብል ለድንግልናኪ ዕፅው፡ እንተ እምኔሁ ሠረቀ ፀሐየ መለኮት ኅትው፡ ማርያም ድንግል ዘሥነ ንጽሕኪ ፍትው፡ ለኅዲር በበፍናዉ በአህጉር ወበድው፡ ዕቀኒ ወለቶሙ ለኄራን አበዉ።
ሰላም ለሐቌኪ በትረ ሌዋዊ ሣዉዕ፡ ዘኢሐፀነኪ ጠል ወዘኢ ሠቀየኪ ነቅዕ ፡ ማርያም ድንግል እግእእተ መላእክት ወሰብእ፡ ሰድኒ ብሔረ ፍግዕ በትንባሌኪ ባቍዕ፡ ምስለ ኅሩያንኪ ደርገ አበሉ በስንዕ።
ሰላም ለአቍያጽኪ እለ ይነብራ ድርገተ፡ እምነ አብራክኪ ላዕለ ወእምነ ሐቌኪ ታሕተ፡ ማርያም ድንግል እንተ ኢተአምሪ ርስሐተ፡ ጽባሐ ወምሴተ ኩሎ ዕለተ፡ ዘይስማዕ ምሕረተኪ ግብሪ ሊተ።
ሰላም ለአብራክኪ በስብሐተ ልዑል ዘአስተብረካ፡ እምአመ ወሀቡኪ ብፅዐ ውስተ አሪታዊት ታዕካ፡ ማርያም ድንግል መንበር ዘአብነ ፔካ፡ ግዜ ስደቶሙ ለኃጥአን እምዐፀደ ዐባይ ፋሲካ፡ ፄውዉኒ መንገሌኪ እኩንኪ ምህርካ።
ሰላም ለአእጋርኪ እለ ፃመዋ በረዊፅ፡ እምቤተ ልሔም ዘይሁዳ እስከ ምድረ ግብጽ፡ ማርያም ድንግል ሥርዓተ ነበልባል ዕፅ፡ ለኅዲር በቤተ ናሕስ እንተ መልዕልተ ኰኩሕ ህኑጽ፡ አጥብብኒ በተግሣፅ ወሡቅኒ እምዳኅፅ።
ሰላም እብል ለዘዚአኪ ሰኰና፡ ዘኢድኅፀ በውስተ ፍና፡ ማርያም ድንግል ትእምርተ ኪዳን ቀስተ ደምና፡ አምዕዝኒ በዕፍረትኪ ወጸግውኒ ጥዒና፡ በከመ ትገብር እም ለንኡስ ሕፃና።
ሰላም ለምከየድኪ እለ ረከቦን መከራ፡ እምፍርሃተ ቀተልት ሐራ፡ እንበለ አሣእን አመ ሖራ፡ ማርይም ድንግል ታቦተ ቃለ ጽድቅ መንፈቀ ዕሥራ፡ ዕጐላት እምዕጐሊሆን ከመ ኪያኪ አፍቀርኩኪ አፍቅርኒ እምይእዜ ለግሙራ።
ሰላም እብል ዘአእጋርኪ አፃብዐ፡ ሐሳበ ኁልቆን ዘኮነ ምስለ ስድስ ርብዐ፡ ማርያም ድንግል ዘተሰመይኪ ምሥዋዐ፡ በረዊፅ ወብጉጉአ አፍጥኒ መጺአ፡ ሶብ አፋየ ስመኪ ስውዐ።
ሰላም ለአፅፋረ እግርኪ ዘኢፈቀዳ ለሥርጋዌ፡ ጥምዐታተ ሕምር ምድራዌ፡ ማርያም ድንግል ሐውልተ ስምዕ ዘወልደ ነዌ፡ ሡቅኑ እምትንታኔ ወባልሕኒ እምአርዌ፡ ላዕለ እምየ ዘአምጽአ ደዌ።
ሰላም ለቆምኪ በቀልተ ዘተመስለ፡ ኅበ ሙኅዘ ማይ ዘበቈለ፡ ማርያም ድንግል እስእለኪ ስኢለ፡ ኢይረድ ታሕቲተ ምጥቅኒ ላዕለ፡ ኢረከብኩ በርኅራኄ ከማኪ ዘብዕለ።
ሰላም ለመልክዕኪ ዘተሠርገወ አሜረ፡ ዘያበርህ ወትረ፡ ፍቅርትየ አንቲ እንተ ታበድሪ ፍቅረ፡ አርእይኒ ገጸ ዚአኪ ማርያም ምዕረ፡ ዘኢይሰምዖ ካልእ እንግርኪ ነገረ።
ሰላም ለፀአተ ንፍስኪ እንበለ ፃዕር ወፃማ፡ ለነቢር ዘልፈ በየማነ ወልድኪ ፌማ፡ ማርያም ድንግል ክልልተ ሞገሰ ወግርማ፡ አጽንዒ በረድኤትኪ ለሕይወትየ ድካማ፡ እምሕይወተ ኄራን አበው ኢታሕ ጽጺ ዐቅማ።
ሰላም እብል በድነ ሥጋኪ ጽሩየ፡ ዘተመሰለ ባሕርየ፡ ኣርያም ድንግል ዐፀደ ወይንየ፡ ንስቲተ ለዕበይኪ እንተ አቅረብኩ ግናየ፡ ኢይትኅደግ ዲበ ምድር ምሥጢ ሰማየ።
ሰላም ለግንዘተ ሥጋኪ በእደ ሐዋርያት አርጋብ፡ በአፈወ ዕፍረት ቅድው ዘሐሳበ ሤጡ ዕፁብ፡ ማርያም ድንግል ወለተ ኅሩያን ሕዝብ፡ ረሰይኩኪ እግዝእትየ ህየንተ እም ወአብ፡ ይኅፅነኒ ከመ ጥብ ፍቅርኪ ሐሊብ።
ሰላም ለመቃብርኪ ለጌቴሴማኒ በመርኅባ፡ እንተ ይእቲ ለኢየሩ ሳሌም ቅሩባ፡ ማርያም ድንግል ለሀገረ መንግሥት ርግባ፡ ትትሜጦ ወርቅ እምአፌር ወጸበለ አፈው እምበሳ፡ ጌቴሴማኒ ለሥጋኪ ምስካባ።
ሰላም ለመቃብርኪ ለኢየሩ ሳሌም በአድያማ፡ እንተ ይእቲ ጌቴሴማኒ ስማ፡ ማሪያም ሰንበተ ዕረፍተ ጽዑራን እምፃማ፡ አመኅደረ ላዕለኪ ፀሐየ ቅዱሳን ዘራማ፡ ኃይለ ልይለ ጸለለኪ በመንክር ግርማ።
ሰላም ለፍልሰተ ሥጋኪ መካነ ፍሥሓ ምጡቀ፡ በአእባነ ባሕርይ በተነድቀ፡ ማርያም ድብተራ እንተ ኢትትከደኒ ሠቀ፡ ጽሒፈ ውዳሴኪ እምኪ ኅልቀ ሶበ ኮነ ጥቀ፡ ዝናመ ክረምት ቀለመ ወሰማይ ረቀ።
ሰላም ለፍልሰተ ሥጋኪ ወለተ ንጉሥ ይሁዳ፡ ወለተ ሌዊ እኁሁ ዘሀብተ ክህነቱ አግዳ፡ ማርያም ድንግል ምዕዝት ዘእምስጌ ረዳ፡ በጽሒፍ ኢይፌጽሞ ለስብሐትኪ እንግዳ፡ እመ ኮነ በቅድሜየ ስፍሐ ምድር ሠሌዳ።
ሰላም ለፍልሰተ ሥጋኪ ደባትረ ብርሃን ኅበ ተተክሉ፡ ለገነተ ጽባሕ በማእክሉ፡ ውድስት አንቲ ወስብሕት በአፈ ኩሉ፡ እምነ ጻድቃን ዘታሕቱ ወእምትጉሃን ዘላዕሉ፡ ማርያም ለኪ ስብሐተ አደሉ።
በዝንቱ ቃለ ማኅሌት ወበዝንቱ ይባቤ፡ ለዘይስእለኪ ብእሲ ጊዜ ረከቦ ምንዳቤ፡ ማርያም ዕንቁየ ክርስቲሎቤ፡ ወምዕዝተ ምግባር እምከርቤ፡ ዘጸገየ ማኅፀንኪ አፈወ ነባቢ።
ስብሓት ለኪ ማርያም በኁልቈ ኩሉ ሥዕርትየ፡ ስብሐት ለኪ ማርያም በኁልቈ ኩሉ ዘተርአየ፡ ስብሐት ለኪ ንግሥትየ በኁልቈ ኩሉ ዘኢያስተርአየ፡ ስብሐተ ድንግልናኪ ዘልፈ ይነግር አፍየ።
እግዚአብሔር ኅቤኪ ፈነወ ቃሎ፡ ገብርኤልሃ አስተማሲሎ፡ ማርይም አምላክ ዘወለድኪ በተደንግሎ፡ ሰላም ሰላም ወሰላም እብሎ፡ ለመልክዕኪ ፈጺምየ ኩሎ።
ለዘኢያፈቅረኪ እግዚትየ ማርያም ውኩፈ ኢይኩን ጽሎቱ፡ ይትገዘም ኑኅ ዓመቱ ወይጥፋእ በከንቱ፡ በአፈ መላእክት ወስብእ ይትረገም ለለሰዓቱ፡ ዘአስተማሰሎ በተውኔት ለማኅሌተ ንግሥኪ ዝንቱ፡ ጌጋዩ ወኃጢአቱ ኢይትኃደግ ሎቱ።
ኦ እግዝእትየ ማርያም ዕቀብኒ ወአድኅንኒ እመከራ ሥጋ ወነፍስ ሊተ ለገበርኪ፡ ሊተ ለአመትኪ።

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s